တာရာမင်းဝေ
တာရာမင်းဝေရဲ့ အမည်ရင်း ကတော့ ချစ်ညီညီ ဖြစ်ပြီး၊ ၁၉၆၇ စက်တင်ဘာ (၁၃) ရက်နေ့မှာ ရန်ကုန် တောင်ဥက္ကလာတွင် သတင်းထောက် ဦးကျော်ရှိန်နှင့် ဒေါ်လှကြည် တို့က မွေးဖွား ခဲ့တယ်။ မွေးချင်း ၃ ဦးအနက် ဒုတိယမြောက် သားဖြစ်တယ်။သူငယ်တန်း ကနေ စတုတ္ထတန်း အထိ တောင်ဥက္ကလာ အမက (၁ဝ) တွင် လည်းကောင်း၊ ပဉ္စမတန်း ကနေ ဒဿမတန်း အထိ ရန်ကင်း အထက (၂) မှာ လည်းကောင်း ပညာ သင်ကြားခဲ့ပြီး၊ ၁၉၈၆ မှာ အခြေခံ အထက်တန်းကို မြန်မာစာ ဂုဏ်ထူးဖြင့် အောင်ခဲ့တယ်။ ရန်ကုန် တက္ကသိုလ် (လှိုင်) ကို အင်္ဂလိပ်စာ အဓိကနဲ့ တက်ရောက် သင်ကြားပြီး ဘွဲ့ရခဲ့တယ်။ မြောက်ဒဂုံ (၄၅) ရပ်ကွက်၊ ပီမိုးနင်း (၁) လမ်းမှာ နေထိုင်သူ ဖြစ်ပါတယ်။
ရွှေဘုန်းလူ ဆိုတဲ့ နာမည်နဲ့ ဗကသ အဖွဲ့ချုပ်က ထုတ်ဝေတဲ့ စာစောင်တွေမှာ ကဗျာတွေ စတင် ရေးသား ခဲ့ပါတယ်။ ရှစ်လေးလုံး လှုပ်ရှားမှုမှာ တက်ကြွစွာ ပါဝင် ခဲ့သလို၊ ဗမာနိုင်ငံလုံး ဆိုင်ရာ ကျောင်းသား သမဂ္ဂများ အဖွဲ့ချုပ်မှာ တက်ွ့ကစွာ ပါဝင် လှုပ်ရှားခဲ့တယ်။ ၁၉၈၉ ဗကသ ပြန်ဖွဲ့ချိန်မှာ ဗကသ ခေါင်းဆောင် တယောက် အဖြစ် တာဝန် ယူခဲ့ပြီး၊ ဗကသ ဥက္ကဋ္ဌ ကိုမင်းကိုနိုင်နဲ့ ဒုဥက္ကဋ္ဌတွေ ဖြစ်တဲ့ ကိုကိုကြီးနဲ့ ကိုအောင်ဒင်တို့ အဖမ်း ခံရချိန်မှာ ဗကသ ခေါင်းဆောင်မှုကို တာဝန် အပြည့် ယူပြီး ဒေါင်းအလံကို ဆက်ကိုင်ခဲ့သည်။ ၁၉၉ဝ မှာ အဖမ်း ခံရပြီး၊ ၁၉၉၄ ခုနှစ် အထိ စစ်အစိုးရရဲ့ ဖမ်းဆီး ချုပ်နှောင်တာကို ခံခဲ့ရတယ်။ အင်းစိန်၊ သာယာဝတီနဲ့ သရက် ထောင်တွေမှာ ချုပ်နှောင် ခဲ့ရပြီး၊ ထောင်က လွတ်လာ ပြီးတဲ့ နောက်မှာတော့ စာပေလောက ထဲကို ခြေစုံပစ် ဝင်ရောက် ခဲ့ပါတယ်။ ထင်ရှားတဲ့ ကဗျာတွေ ကတော့ အကျဉ်းထောင်တွေ အတွင်းမှာ ရေးစပ်ခဲ့တဲ့ “ကျောင်းဖွင့်ချိန်”၊ “ဥဒါန်း” နဲ့ “ကျောင်းသား အတ္ထုပ္ပတ္တိ” တို့ပဲ ဖြစ်တယ်။
၁၉၉၄ ခု မေလထုတ် ရင်ခွင်သစ် မဂ္ဂဇင်းမှာ ‘ရေစီးကြောင်းထဲမှ လူများ’ ဝတ္ထုတိုမှာ ‘တာရာမင်းဝေ’ ဆိုတဲ့ ကလောင် အမည်ကို စတင် အသုံးပြု ခဲ့ပါတယ်။ ၁၉၉၅ မှာ တာရာမင်းဝေ ကလောင် အမည်နဲ့ ‘ပန်းခေတ်က လမင်း’ ဆိုတဲ့ သူ့ရဲ့ ပထမဆုံး လုံးချင်း ဝတ္ထု ထွက်ပြီး ချိန်မှာတော့ လူငယ် စာဖတ် ပရိသတ် တွေရဲ့ အားပေးမှုကို ရရှိ ခဲ့ပါတယ်။ ၁၉၉၆ – ၉၇ ထုတ် သရဖူ မဂ္ဂဇင်း တွေမှာ မောင်ယော ကလောင် အမည်နဲ့ လည်းကောင်း၊ စုဖွဲ့ ကလောင် စန်တီယာဂိုနဲ့ ကလောင် အမည်နဲ့ လည်းကောင်း စာပေ ဝေဖန်ရေးတွေ၊ စာပေ သဘော တရား သီဝရီတွေ ရေးသားခဲ့တယ်။ မောင်ဓား၊ ဦးဦးအံဘွယ် စတဲ့ ကလောင် အမည်တွေ နဲ့လည်း ရေးသားခဲ့တယ်။ စုစုပေါင်း လုံးချင်း ဝတ္ထု (၄၂) အုပ် ရေးသားခဲ့ပြီး၊ ဝတ္ထုတိုတွေ ကဗျာတွေလဲ ရေးသား ခဲ့ပါတယ်။ ဟန်သစ် မဂ္ဂဇင်းပါ “အားလူး စားသူများ” ဝတ္ထုတိုနဲ့ ဖြူးမိတ်ဆွေများ စာပေဆုကို ရရှိခဲ့တယ်။
စာပေ အပြင် ပန်းချီ ဆွဲခြင်း၊ ရုပ်ရှင် ဗီဒီယို ဇာတ်ညွှန်း တွေနဲ့ သီချင်းတွေလဲ ရေးသားခဲ့သည်။
ပထမဆုံး ဗီဒီယို ဇာတ်ညွှန်း ကတော့ “ရွှေရောင် ဖိနပ်မှာ အစိမ်းရောက် ကြက်ခြေခတ်နဲ့ ကောင်မလေး” ဖြစ်ပါတယ်။ တာရာမင်းဝေရဲ့ ဝတ္ထု အချို့ကို ဗီဒီယို ရုပ်ရှင် ရိုက်ကူး ခဲ့ရာမှာ၊ အဲဒီ အထဲက မောင်မျိုးမင်း(ရင်တွင်းဖြစ်) ရိုက်ကူးကာ ဒွေး၊ နန္ဒာလှိုင်တို့ သရုပ်ဆောင်ထားတဲ့ “ကောင်းကင်အကြွေ ကောက်တဲ့လက်”၊ ဒါရိုက်တာ လွင်မင်း ရိုက်ကူးကာ နေတိုး၊ အိန္ဒြာကျော်ဇင်တို့ သရုပ် ဆောင်ထားတဲ့ “တစ်ကိုယ်တော်ရေးတဲ့ ကကြီး ခခွေး”တို့ဟာ ထင်ရှားတယ်။ ဒါရိုက်တာ မောင်သူရ (ဇာဂနာ) ရိုက်ကူးခဲ့တဲ့ “မြင်းစီးထွက်သော အိပ်မက်များ” ရုပ်ရှင် ကတော့ ပြည်တွင်းမှာ ပြသခွင့် မခဲ့ပါဘူး။
၁၄ – ၂ – ၉၈ မှာ မခင်မေဝင်း (စာရေး ဆရာမ မနော်ဟရီ) နဲ့ လက်ထက် ခဲ့ပြီး၊ သား တစ်ဦး ထွန်းကားခဲ့တယ်။
“လူနံပါတ် (၁၃)” ဝတ္ထုတို စုစည်းမှုနဲ့ “နက္ခတ် ရစ်သမ်” ကဗျာ စာအုပ် တအုပ် ရေးသား ထုတ်ဝေရန် စီစဉ်နေဆဲ၊ ၂ဝဝ၇ ခု၊ သြဂုတ်လ ၅ ရက်နေ့ မွန်းလွဲ ၁၂ နာရီ ၄ဝ မှ မြောက်ဥက္ကလာပ ဆေးရုံကြီးတွင် ကွယ်လွန်၊ ကွန်လွယ်ချိန်မှာ ဇနီး ဖြစ်သူ စာရေး ဆရာမ မနော်ဟရီနဲ့ သားဖြစ်သူ ခေတ်နေ (ခ) ကြယ်စင်မင်းဝေတို့ ကျန်ရစ် ခဲ့ပါတယ်။
—————————————————————————————————
ရေးသား ထုတ်ဝေခဲ့တဲ့ စာအုပ်များ
- ကိုးမရှိတဲ့နဝင်း
- ကောင်းကင်အကြွေ ကောက်တဲ့လက် (ဇန်နဝါရီ ၂ဝဝ၆)
- ကိုယ်ရေးကိုယ်တာ ပုရပိုက် (ဖေဖော်ဝါရီ ၂ဝဝ၇)
- ကိုယ့်လက်နဲ့ ဖမ်းမိတဲ့နဂါးငွေ့တန်း (အောက်တိုဘာ ၂ဝဝ၂)
- ကျွန်တော်တူးဖော်ခဲ့သည့် မြေစိုင်မြေခဲများ အကြောင်း (စက်တင်ဘာ ၂ဝဝ၅)
- ကျွန်တော်နှင့် ဆောင်းရာသီ ဒဿန (ဇန်နဝါရီ ၂ဝဝ၇)
- ကျွန်တော်နှင့် ကြေးသွန်းယဉ်ကျေးမှု
- ကျွန်တော်နှင့် ကြယ်မြင်လမြင် လောကဓံ
- ကျွန်တော်နှင့် ဧဒင်ကချေသည်
- ကျွန်တော်မှ အပြန် (သြဂုတ် ၂ဝဝ၆)
- ငါသည်သာ ပန်းဖြစ်၍ နောက်တစ်ကြိမ် ပြန်ပွင့်ခွင့် ရခဲ့သော် (ဒီဇင်ဘာ ၂ဝဝ၆) ဒုတိယအကြိမ်
- နတ်ပျိုမအတွက် ပန်း (ဒီဇင်ဘာ ၂ဝဝဝ)
- ပန်းခေတ်က လမင်း
- ပန်းလက်ဖဝါးမှာ ပါးအပ်ခွင့်မရှိတဲ့ ကောင်မလေး
- ပြာ
- ပြိုင်မြင်းတို့ရဲ့ ခွာသံ (ဇန်နဝါရီ ၂ဝဝ၅) ဒုတိယ အကြိမ်
- ဘယ်ဘက်လက်ထဲမှာ ဝှက်ထားတဲ့ပုံပြင် (ဇွန် ၂ဝဝ၆)
- မနက်ဖြန်ခါမှာ ထားခဲ့တဲ့မျက်နှာ
- မိုးခေါင်လို့ တီးတဲ့ဗုံသံ (ဇူလိုင် ၂ဝဝ၄)
- မြင်းစီးထွက်သော အိပ်မက်များ (နိုဝင်ဘာ ၂ဝဝ၆)
- မှော်ဆရာရဲ့ ကျောင်းစာအုပ်
- ရွှေဖိနပ်မှာ အစိမ်းရောင် ကြက်ခြေခတ်နဲ့ ကောင်မလေး (ဇန်နဝါရီ ၂ဝဝ၆) တတိယ အကြိမ်
- လူငယ်တယောက်ရဲ့ ကျောက်ထွင်းရာဇဝင်
- ဝင်္ကပါကို ဖွင့်တဲ့သော့ (စက်တင်ဘာ ၂ဝဝ၆)
- သူ့အိုးပုတ်ကလေးကို ကျွန်တော် ပြန်မပေးပါ (ဇူလိုင် ၂ဝဝ၇)
- သင်နှင့် နံနက်ခင်းကိုသာ ဝင်ခွင့်ပြုမည် (ဇွန် ၂ဝဝရ) တတိယ အကြိမ်
- အရှေ့မြို့ရိုးမှ မိုးရေစက်များ
- အလံမထူခဲ့သော လက်များ (မေ ၂ဝဝ၇)
- အာလာဒင်မသိလိုက်တဲ့ မီးခွက် (ဇူလိုင် ၂ဝဝ၆)
About နေ အ ဝေး
0 comments:
Post a Comment