ဆာမူရိုင်းနိုင်ငံတော်ကို
ဆာမူရိုင်းတွေ စုပြီး ထူထောင်လိုက်ကြတယ်။
ဆာမူရိုင်းနိုင်ငံတော်အလံက အနက်ရောင်
ဆာမူရိုင်းနိုင်ငံရဲ့ စီးပွားရေးက ဓားနဲ့မြားထုတ်လုပ်ရေး
ဆာမူရိုင်းတွေပဲ လယ်စိုက်ပြီး
ဆာမူရိုင်းတွေပဲ ရိပ်သိမ်းကြ
မိန်းမဆိုတာ
ဆာမူရိုင်းနိုင်ငံတော်မှာ အဖျော်ဖြေခံပစ္စည်း
အလှပြင်တဲ့ ပညာကလွဲရင် ဘာပညာမှမသင်ကြရ
ဆာမူရိုင်းနိုင်ငံတော်မှာ
ချစ်ခြင်းမေတ္တာမရှိ
လိင်စိတ်နဲ့
သတ်ချင်ဖြတ်ချင်စိတ်သာ ရှိရဲ့။
ချယ်ရီတွေပွင့်ချိန်ဆို
ချယ်ရီပန်းပင်တွေအောက်
ဆာမူရိုင်းတွေရောက်လာပြီး သစ္စာရေသောက်ကြတယ်။
ဆာမူရိုင်းနိုင်ငံတော်မှာ
ဆာမူရိုင်းရဲ့သားနဲ့
ဆာမူရိုင်းရဲ့သမီးဟာ လက်ထပ်ထိမ်းမြားခွင့်ရ
ခေတ်အဆက်ဆက်
ဆာမူရိုင်းလေးတွေပဲ မွေးဖွားလာကြ။
ဆာမူရိုင်းနိုင်ငံတော်မှာ
ကဗျာမရေး
ပန်းချီမဆွဲ
ဂစ်တာ မတီး
ပြဇာတ် မက
ဆံပင်တိုလည်း မညှပ်ရ
မုတ်ဆိတ်လည်း မရိပ်ရ
တစ်ယောက်ကိုတစ်ယောက် သတ်ချင်သတ်
မသတ်ချင်ရင် ကိုယ့်အသက်ကိုယ်ပြန်သတ်။
ဆာမူရိုင်းနိုင်ငံတော်မှာ
ထမင်းစားချိန်က လွဲရင်
အရွယ်ရောက်ပြီးသူတိုင်း
ကောက်ရိုးအရုပ်ကို ဓားနဲ့ခုတ်နေကြရတယ်။
ဓားခုတ်ချက်တိုင်း
ဓားခုတ်ချက်တိုင်း
“အရှင့်အတွက်”
“အရှင့်အတွက်” လို့
အသံနက်ကြီးတွေနဲ့ ကြွေးကြော်ကြရတယ်။
ဒါပေမဲ့
ဆာမူရိုင်းနိုင်ငံတော်မှာ “အရှင်သခင်” မရှိ
ဆာမူရိုင်းနိုင်ငံသားတိုင်း ကျွန်တွေချည်းပဲ။
မနက် အရုဏ်တက်ပြီဆိုတာနဲ့
ကောင်းကင်ပလ္လင်ပေါ်က
ထာဝရဘ၀ရှင် နေမင်းကြီးကို
ဆာမူရိုင်းအားလုံး ရှိခိုးနေကြတော့ရဲ့။
မိုဃ်းဇော်
ပိတောက်ပွင့်သစ်မဂ္ဂဇင်း၊ ဇူလိုင်လ ၂၀၁၀
About နေ အ ဝေး
0 comments:
Post a Comment